過年前先至電過頭髮, 相隔幾耐啫, 又再電過.
最衰之前我冇概念, 由得髮型屋阿姐揸主意啦, 佢話過去連續電咗幾個相同髮型, 效果好正, 咁咪信佢囉. 點知佢所謂嘅好正, 主要只係電下半截, 上半完全冇郁過, 仲要用大芯捲髮添, 成個頭先至用得嗰四五個芯, 三兩下手勢就完成, 唔怪得佢話我係全場最快搞掂最快走嘅一個啦.
我啲頭髮一向好耐鬈, 只要唔剪嘅話, 一年半載依然好鬈. 我覺得咁反而唔係幾好, 因為一段時間後, 明顯地與新長出嘅頭髮形成強烈對比好唔匹配. 通常喺咁嘅情況下, 只得兩個選擇, 一係剪咗下半截鬈髮, 一係補電上半截直髮, 讓整體上順眼啲, 唔駛咁突兀. (諗諗吓先發現, 原來過去每當嚟到咁嘅樽頸時刻, 我多數只會一個選擇, 就係入髮型屋引剪一快, 鏡頭一轉, 就變成男仔頭離開髮型屋)
上次嗰位阿姐嘅電髮技術唔太得, 手工又馬虎, 結果我嘅頭髮好快就打回原形. 而最難頂係唔鬈唔直髮尾又翹起, 成個奧米加咁款, 勁肉酸. 而每當我開始感到煩惱時, 即係意味住會有所修改, 呢次我揀咗再電鬈多次.
本來有諗過再光顧阿姐嗰間, 最多搵第二個師父啫嘛, 不過最後都改變主意. 因為上次婉拒阿姐不斷游說我換隻好啲嘅電髮水, 當時驚佢會玩大報復攞我個頭嚟較飛, 所以敷衍佢會再上門光顧焗油服務, 結果當然係去如黃鶴啦我. 為怕被認出惹來殺髮之禍, 又諗起上次佢哋唔用洗頭水洗髮, 咪搞喇, 都係搵過第二間.
喺附近格勻晒價, 套餐形式全都好貴, 惟有單一揀電髮, 其中一間門口嘅價錢牌寫住電髮180起包洗剪吹, 一於入呢間啦.
由於我好少定期幫襯同一家髮型屋, 所以唔會有指定髮型師, 咁仲好啦, 一來唔駛額外收費, 二來畀啲機會實習生學嘢嘛, 話唔定從中會發掘到一個啱我嘅髮型師呢.
入內, 邊個得閒就邊個嚟招呼我.
根據過往經驗, 門口嘅價錢牌萬萬不能信, 皆因只係用來請君入甕嘅技倆, 所以未被洗濕頭之前要先講好價, 以免中伏.
師父 : 如果只係電髮, 最基本嘅電髮水係280. (佢攞咗本價目表指畀我睇)
我 : 哦, 咁我就電呢隻啦. (真係笨喇, 唔記得問佢, 最基本都要280, 咁門口嘅180又係邊隻呢? 我估可能係補電價)
師父 : 不如你試吓靚啲嗰隻藥水吖, 多一百啫嘛. (指住280下面另一款藥水價錢)
我 : 唔駛喇.
師父 : 真係靚啲架喎.
我 : 我想睇吓你電出嚟嘅效果先, 如果係靚嘅, 下次再幫襯你試貴嗰隻.
今次我唔係敷衍架, 真係諗住如果佢電得我嘅髮型靚會再光顧, 因為我都想 settle down, 唔想次次要周圍搵周圍格價.
對於佢話靚嘅藥水冇咁傷頭髮, 我喺度諗, 今次係考驗佢嘅技術, 如果電得我髮型係靚嘅, 就算頭髮傷晒, 最多剪晒再留過啫, 但起碼我搵到個卸用髮型師, 以後咪唔駛煩囉. 相反如果佢電到個髮型好差, 我已經勁樣衰啦, 髮質絲毫無損又有鬼用咩? 況且, 電髮水靚唔靚佢話架啫, 話唔定效果相差無幾呢, 咁駛鬼嘥多一嚿水呀. 所以平時易受昆嘅我, 今次意志好堅定, 叻叻!
師父 : 咁你會唔會做埋焗油?
我 : 唔駛喇.
師父 : 你咁短時間之內電兩次好傷架喎, 焗吓油會好啲.
我 : umm..... 如果我電380嗰隻藥水, 可唔可以包埋焗油? (嘻, 我知我好 cheap, 都係問吓啫, 諗住碰吓運氣嘛, 假如可以嘅我咪得益囉, 假如唔可以嘅, 咪乘機謝絕再被游說囉)
師父 : 我哋冇咁嘅規矩喎.
我 : 但人哋三百蚊包埋焗油, 點解你哋唔得嘅?
師父 : 咁嗰啲藥水肯定仲衰過280呢隻.
既然冇特別優惠, 我就照原定電最基本嗰隻.
我全神貫注留意師父為我準備捲頭髮.
當我見到佢揀髮芯時.....
我 : 你唔係又用咁大個髮芯係嘛?
師父 : 我見你之前嘅型係咁大架喎.
我 : 就係因為嗰個衰人用咁大芯, 我先至三個月唔夠要再電過啫嘛. 仲有呀, 你一定要電到上頭頂, 千祈唔好只電下半截, 同埋我唔要髮尾會翹起.
師父 : 放心啦, 至少保持幾個月依然仲會好鬈..... 咁用最幼芯嗰隻啦.
我 : 幼得滯會唔會出嚟嘅效果好蛇仔呀? 我唔想喎.
師父 : 唔會好似蛇仔咁幼..... 咁不如呢款喇? 怕唔怕粗得滯吖?
我 : 乜得大中細三款芯咋? 有冇啲中芯與幼芯之間嘅 size 呀?
師父 : 冇喇, 不如中芯同幼芯一樣一半啦?
我 : 吓? 咁都得架咩?
師父 : 得, 好多都係咁架.
我 : 咁好啦.... 咪住先, 你唔會一邊頭髮用中芯, 一邊用幼芯呀可? 如果係會好搞笑架喎.
師父 : 哈, 梗係唔會啦, 我會隔住隔住咁捲.
師父為我開始捲左邊, 佢指示學徒替我捲右邊.....
我最唔鍾意就係咁嘅情況, 一個頭同時間被兩個人舞, 你估而家好似拍廣告咁, 一邊師父做一邊徒弟做, 然後實驗證明話畀大家知, 師父嘅手勢高徒弟一班呢啲比較咩? 兩個人一齊做係就係慳時間, 但手勢力度始終唔一樣, 出到嚟嘅效果肯定有偏差, 我唔想鴛鴦頭呀大佬.
好在鬈髮最大特點就係凌亂, 就算有偏差都唔多覺, 否則我一定會提出我嘅憂慮.
電完嘅後果好唔好? ok 啦, 夠鬈, 鬈嘅弧度都幾靚嘅.
嘻嘻, 不過冇用吖, 我而家又心思思想做負離子直髮.
真係作死咯, 一係幾年乜都唔做, 一係幾個月未夠連電三劑, 實在對頭髮唔住. 但有乜法子啫, 鬼叫佢嘅主人我咁多心咩, 直嘅時候想像鬈髮一定會好靚, 鬈嘅時候又想像直髮會好睇, 如是者多次直變鬈鬈變直, 但效果與想像卻係兩回事喎, 結果次次都重蹈覆轍.
鬈變直還好, 起碼容易打理冇咁煩, 但直變鬈就傷喇(啲頭髮), 因為睇唔慣個頭突然大咗咁多, 如果唔 gel, 遇風一吹就變掃把, 所以電完初期對我嚟講係好關鍵時刻, 稍為唔耐煩嘅話又唔想再入髮型屋, 我就自行買直髮膏將頭髮洗直, 係就係唔再咁鬈, 不過啲頭髮就傷上加傷囉. 搞咁多嘢最後都係還原基本髮, 唔只嘥錢嘥時間嘥精神, 仲因為煩惱而死好多細胞添, 你話我電頭髮嚟做乜吖?
鬼咩, 正常人嚟講, 試過一兩次咁嘅情況, 以後決定電直或電鬈前, 一定會三思而後行架嘛. 偏偏我係非常人, 乜都冇諗, 只得一股衝勁, 想做就去做, 做完之後, 先至猛然醒起種種後果, 可惜已經太遲了.
嗱, 好似今次一役, 我已經同自己講, 鬈髮好難打理, 以後唔好再電喇.
即管聽住先啦吓, 可能不久將來, 我又會喺度寫電髮記架喇.
